Die week se Lewende Water - 4 Februarie2026
Liewe vriende
Hierdie week voel net anders. Nie omdat daar iets groot of dramaties gaan gebeur nie, maar omdat ons weet Nagmaal is op pad. En dit maak ’n mens stiller.
Dis Februarie, die jaar is al mooi aan die rol, en baie mense is al klaar moeg, mense probeer net kop bo water hou. Tog staan die nagmaalstafel daar, rustig en geduldig.
Jesus is nie per ongeluk daar nie, en niemand het Hom gedwing nie. Hy het self gekies om hierdie pad te loop.
Daarom vra hierdie week dalk nie dat ons onsself moet regkry of beter moet probeer wees nie, maar dat ons eerlik sal wees oor waar ons nou is. God red ons nie deur dinge van ver af reg te maak nie, Hy kom naby, Hy klim in ons lewens in, Hy stap saam en dra saam.
Dis hoekom die kruis so naby voel, dit raak ons eie stories. Nagmaal is nie vir mense wat alles uitgesorteer het nie, maar vir mense wat honger is: honger na rus, na vergifnis, na nuwe moed. En al verander alles rondom ons, bly God dieselfde. Sy genade het nie verdwyn of aanbeweeg nie, dit wag vir ons. En Sondag mag ons weer kom sit, met oop hande, en ontvang wat ons nie self kan regmaak nie.
Groete
Ds. Jacques
Familienuus
Kliek hier vir Sondag, 8 Februarie 2025 se Familienuus