Lewende Water - 20 September 2021

Tydens die Belydenisklaskamp die afgelope naweek erken een van die jong manne, na sy span ‘n paar Volleyball wedstryde verloor het, dat hy ‘n swak verloorder is… En toe wonder ek sommer na die Springbokke se wedstryd wat ook die afgelope naweek gespeel het of dit nie maar ‘n bietjie waar is van elkeen van ons nie. Dis baie lekkerder om te wen as om te verloor. Ons verloor in elk geval baie meer keer in die lewe as wat ons wen.

Persoonlik glo ek dat dit nie vir God saak maak of ek wen of verloor nie, maar eerder hoe ek aan die wedstryd van die lewe deelneem. Paulus sê in 1 Korintiërs 9:26 “Ek hardloop dan ook soos een wat nie van sy doel onseker is nie; ek slaan soos ‘n bokser wat nie in die lug slaan nie. Maar ek oefen my liggaam en bring dit onder beheer, sodat ek nie ander tot die stryd oproep en nie self kwalifiseer nie…”

Ek glo ook dat of jy wen en of jy verloor, God in elk geval by jou is. Sterkte vir jou week!
Roelf

Lewende Water - 14 September 2021

Liewe Broer en Suster.

Familie

Wie is jou familie? Hoe lyk jou familie?

Wat is die rol wat hierdie familie van jou speel of gespeel het gedurende Covid 19?

Ons het sekere idees oor hoe ‘n familie moet lyk. Die idee is gewoonlik ‘n pa, ma en kinders. Daar is ook families wat nie so lyk nie. Hulle is ‘n oupa en ouma met die kleinkinders maar jy kry ook kinders wat kinders grootmaak. Familie is soms ook vriende wat nader aan jou is as jou bloedfamilie. Die Bybel erken dit wanneer jy in Spreuke lees dat vriende baie keer nader aan jou is as jou bloedfamilie.

Daar is egter ook ‘n christen-familie waaraan ons behoort. Dis die familie waar God die Vader, Jesus Christus die Seun en die Heilige Gees jou geestelike familie tuiste is.

Onthou vandag dat hierdie familie jou verseker dat jy nie honger sal word nie – die brood wat gebreek is, is tot volkome versoening en inlywing/deelword van hierdie familie. Jy sal ook nie dors word nie want Christus is die fontein van die lewe - as jy van die water drink sal jy nooit dors word nie.

Hierdie familie gee jou ook die versekering dat hulle jou nooit alleen of in die steek sal laat nie. Ons hoef nie bang te wees nie

Wees dankbaar vir jou geestelike en bloedfamilie.

Pas jou en jou familie op en bly asb gesond.

Groete
Willem

Lewende Water - 6 September 2021

‘n Paar jaar gelede is daar ‘n ondersoek in ‘n Japanese skool gedoen. Een van die vrae wat hulle moes antwoord was: “Is julle moeg?” Op hierdie vraag het 80% van die laerskool se leerders “Ja” geantwoord. By die Graad Agts en Neges het 98 % “Ja” geantwoord. Hulle het nie die ondersoek na die hoër grade uitgebrei nie – maar as mens die tendens sou volg lyk dit of omtrent 100% van die hoërskoolkinders en volwassenes sou sê: “Ons is moeg en uitgemergel en het rus nodig.” Hulle voel soos my reënmeter wat êrens ‘n geheime lek het.

Die probleem is dat meeste mense by die verkeerde plekke gaan soek om tot verhaal te kom.

Daar is net een oplossing vir ware, langdurige rus. Ons lees daarvan in Matteus 11:28 tot 30: “Kom na my toe, almal wat uitgeput en oorlaai is, en Ek sal vir julle rus gee. Neem my juk op julle en leer van My, want Ek is sagmoedig en nederig van hart, en julle sal rus kry vir julle gemoed. My juk is sag en my las is lig.

Sonder om in diepte op hierdie vers in te gaan, kan ek sê: Kyk na jouself. Moenie van werk jou afgod maak nie. Kry ‘n ritme van werk en rus. En as jy dit kan regkry om by die Here te rus, soveel beter. Sê vir Hom jy is moeg. Gaan sit op jou stoep en drink ‘n koppie koffie. Sit net in die teenwoordigheid van die Here. Gaan probeer dit!

Sterkte vir jou week.
Roelf

Lewende Water - 30 Augustus 2021

Liewe Broer en Suster

Awareness, expectancy, discipleship as a state of being – all of this is bound up with the idea of the disciple as someone who follows. (Williams, Rowan. Being Disciples (p. 9). SPCK. Kindle Edition.)

Vir my omskryf hierdie drie woorde ons lewe in Christus.

Bewustheid

Ons moet onsself instel om bewus te wees van God in Christus deur die Heilige Gees se teenwoordigheid. Dit beteken nie jy gaan nou in alles Christus raaksien en elke oomblik oorboord gaan oor Sy teenwoordigheid nie. Dit beteken jy erken en weet Christus hou die goed en sleg, mooi, lekker en hartseer, alles wat met ons gebeur, in Sy hand. Hy sal ons nooit in die steek laat en ons nooit alleen laat nie.

Verwagting

Ons is soms so plat en voos gestoei vir ‘n plek in die son dat ons nie meer in verwagting leef dat Christus ons situasie/omstandighede oombliklik kan verander nie. Dink aan die blinde, die melaatses en selfs die tollenaar wie se lewe dadelik verander het toe hulle Christus in hul lewens toegelaat het.

Dissipelskap.

Soveel hoofde soveel sinne. Daar is soveel definisies en verklarings oor wat dissipelskap beteken. Dissipelskap beteken - ek is ‘n volgeling van Christus. Ek is nie volmaak en wonderlik nie, ek worstel elke dag met die lewe maar met my oog en lewe gerig op die opgestane Christus.

Laat toe dat hierdie drie woorde jou lewe rig en lei. Groete Willem

Lewende Water - 23 Augustus 2021

Daar is ‘n staaltjie wat vertel van ‘n man wat gesterf het en by die hemelpoorte aan gekom het. ‘n Engel het hom voorgekeer en gevra dat die man moet vertel waarom hy dink hy dit verdien om hemel toe te gaan. Die man het geglimlag en gesê: “Wel ek was my lewe lank, elke Sondag in die kerk.” “Uitstekend!” antwoord die engel “Dit verdien 3 punte en jy kort ‘n duisend om deur die poorte te gaan”. Die man was geskok. “Verdien al my jare van kerk toe gaan net 3 punte?! Nou ja, ek het darem ook Sondagskool gegee”. Die engel antwoord: “Dit verdien so 4 punte”. “Net 4 punte!”, roep die man uit. “Wel ek was getrou aan my vrou en ek was ‘n goeie buurman gewees?” “Dit verdien so 2 punte” antwoord die engel. Die man roep toe uit: “Sjoe teen die trant sal ek nooit in die hemel kom nie, behalwe deur die genade van Bo!” “Presies” glimlag die engel. “Kom gerus binne!”

Die Bybel leer dat ek en jy niks kan doen om God se genade te verdien nie. Ons kan maar alleen glo dat Jesus ons enigste Verlosser is.
Ek loof die Here elke dag vir Sy arms vol genade! Hy gee vir ons wat ons so bitter nodig het, nie wat ons verdien nie! Liefde
Liesel xx

Lewende Water - 17 Augustus 2021

Liewe vriende.

So paar jaar terug was ek met vakansie in die Kaap. Soos julle weet, hou ek van koffie drink en rustig wees in die natuur. Op daardie spesifieke dag, onthou ek hoe gefrustreerd ek was in die koffiewinkel waarin ek gesit het, want die diens was stadiger as ñ vragmotor in eerste rat op Van Reenens Pas.

Ek onthou dat ek lank moes wag vir iemand om my bestelling te kon neem en ook hoe ek gewonder het: “Moes hulle koffie plantasie toe stap om bone te gaan haal om te 'roast' ".

Toe tref die ironie my, ek sit om rustig te wees in die natuur, maar was meer besorgd oor die tempo?

Ons lewens is gejaagd, vol en gevul met aanpassings. Tempo is die laaste ding waarop ons ons tyd moet mors. In my gejaag na die werk mis ek die opbreuk van ñ nuwe dag, in my gejaag na die huis mis ek die maan wat knipoog; in my gejaag mis ek die glimlag wat my bedien by die tolhek, in my gejaag mis ek die lewe.

Daarom wil ek die volgende woorde vir jou gee vir die week:

Wees stil en weet Ek is die Heer
Ek spreek en wind en golwe bedaar
Ek sal ook jou getrou bewaar
Wees stil en weet Ek is die Heer
Ek ken jou pyn, jou donkerste nag
Ek is by jou, Ek gee jou krag
Wees stil en weet Ek is die Heer
Bly waak en bid, volhard in geloof
Ek is by jou soos Ek beloof

Wees stil, wees rustig sit en kyk, die Here is saam jou.

Groete
Drian

Lewende Water - 10 Augustus 2021

Ek het die afgelope Saterdag tot in my kleintoontjie lekker gekry toe Mornè Steyn die Bokke weer in die laaste minute van die wedstryd teen die Britse Ierse Leeus laat wen het. Ek het my ook verlekker in die grappies wat kort na die wedstryd begin verskyn het – met sogenaamde dreigemente van Mornè dat hy die Leeus weer oor 12 jaar sien wanneer hyself reeds 49 jaar oud sal wees.

Dis nou maar een ding van ons volk hier aan die Suidpunt van Afrika – ons het die vermoë om die humor in enige moeilike situasie te sien.
En om bietjie te lag doen ons goed. Behalwe dat dit goedvoelhormone in ons afskei wat tot ons emosionele en fisiese gesondheid kan bydra, maak dit dat ons nie alles so ernstig in die lewe opneem nie.

Salomo het iets hiervan verstaan toe hy eeue gelede reeds geskryf het:
“ ‘n Vrolike mens is ‘n gesonde mens, ‘n neerslagtige mens raak uitgeput…” (Spreuke 17:22) en ook: “Dit gaan altyd sleg met ‘n bedrukte mens; die blymoedige mens se hele lewe is ‘n fees…” (Spreuke 15:15)

Kom ons probeer hierdie week so ‘n bietjie ligter deur die lewe te gaan omdat ons weet: God is in beheer…

Sterkte vir jou week.

Roelf

Lewende Water - 2 Augustus 2021

Wanneer laas het jy agteruit van ’n dak af probeer klim en op ’n leer probeer trap wat net bietjie te kort is? Jy hang oor die rand van die dak en voel-voel met jou voete en rek nog so ’n bietjie verder totdat jy die leer onder jou voete voel. Jy moet eers iets onder jou voete voel voordat jy kan laat los – voordat jy bereid is om jouself oor te gee. Dit is waarvan Romeine 12 :1 praat. Daar staan: ‘Gee jouself aan God as ’n lewendige en heilige offer wat vir Hom aanneemlik is.’

Paulus sê hierdie leer onder jou voete is die genade van God. Dit is alles wat Jesus uit genade gedoen het om jou sy kind te maak. Daarom sê Paulus: Op grond van die groot ontferming van God, op grond van alles wat Jesus vir jou gedoen het, op grond van Jesus se kruisdood en opstanding, op grond van al hierdie dinge doen ek ’n beroep op jou:
Laat los! Gee jouself. Klim van die dak af. Die leer is daar – al kan jy dit nie sien nie.

Een van die pilare van ons Christelike geloof is: Genade alleen. Hou vas aan God se genade.

Sterkte vir jou week
Roelf

Lewende Water - 28 Julie 2021

Liewe vriende

Partykeer wonder ek, hoe sterk is ñ mens se kop? Wat is die invloed van ons omgewing, dit wat ons hoor en seker tot groot mate waarmee jy jouself omring, op ons manier van dink en optree?

 PSALMS 1:1-3 NLV stel die volgende:

 Gelukkig is die mens wat nie loop volgens die raad van goddeloses, of staan op die pad van sondaars, of sit in die vergadering van spotters nie. Hy vind egter vreugde in die gebooie van die Here en oordink sy voorskrifte dag en nag. Hy is soos ’n boom geplant langs waterstrome, wat vrugte dra op die regte tyd. Sy blare verwelk nie; in alles wat hy doen, is hy voorspoedig.

 Laat mens dink ... Is jy as boom, tans reg geplant in jou lewe? Omring jy jouself en ook jou denke met die dinge wat jou op die regte tyd laat vrugte dra?

 Dit was vir my verstommend hoe ons in ñ oogwink, toe die "looting" plaasvind, amper almal totaal en al van Covid-19 vergeet het … is dit nie waar nie?

 Vir ñ oomblik was ons gedagtes verskuif van hartseer, pyn en onsekerheid na ondermeer woede, verwarring en dalk selfs haat.

 Is dit goed wat ons langs waterstrome plaas?

 Die vraag is met ander woorde:  Besef ons dat ons self ñ verantwoordelikheid het in ons manier van dink op dit waarop ons, ons fokus plaas? Ons moet ons langs die regte strome plaas, sodat ons op die regte tyd kan vrugte dra.

 Daarom los ek jou weer met die woorde van Psalm 1 en nooi ek jou uit om hierdie week opnuut stil te word saam met die Here … om ons denke op die regte dinge te plaas. Ons mag dalk verras word met die uitkoms:

 Gelukkig is die mens wat nie loop volgens die raad van goddeloses, of staan op die pad van sondaars, of sit in die vergadering van spotters nie. Hy vind egter vreugde in die gebooie van die Here en oordink sy voorskrifte dag en nag. Hy is soos ’n boom geplant langs waterstrome, wat vrugte dra op die regte tyd. Sy blare verwelk nie; in alles wat hy doen, is hy voorspoedig.

Groete

Drian

Lewende Water - 19 Julie 2021

Liewe Broer en Suster.

Ek is besig om ‘n boek van Richard Rohr te lees genaamd: Everything is sacred. Op bladsy 169 skryf hy: “ … the reason we can trust Jesus’s resurrection is that we can already see resurrection happening everywhere else.”

In die fliek, “The Perfect storm” waarin George Clooney die kaptein van ‘n vissersboot is, word hulle in drie weerstelsels vasgevang. Ons beleef tans in Suid Afrika die perfekte storm. Ons ekonomie sukkel om aan die gang te kom, Covid het kom nesskrop tussen ons en dan is daar ‘n misdadige element wat kyk wat hulle kan vat, breek en brand.

Ek sien die oorwinning van die opstanding van Christus om my.

Mense wat in ons gemeente mekaar help met suurstof, kos wat aangery en verdeel word vir honger en moedelose mense in Natal, ‘n huis in ons gemeenskap wat afgebrand is met ‘n gemeenskap wat net gee en swart en wit wat saamstaan en landswyd sê genoeg is genoeg.

Ek sien die groen spruite van Sy opstanding in die natuur wat stadig maar seker besig is om te verander en mense wat ons eredienste aanlyn volg en aanstuur.

In my hart word ek stil as die opstandings krag van Christus se liefde my gemoed met Sy bevestiging voed: Niks kan my van die liefde van Christus skei nie Rom 8:31 e.v. Groete Willem

Lewende Water - 13 Julie 2021

Waarvoor bid jy vandag? Wat dryf jou gebed?

Terwyl ek laat die aand besig is met vandag se Lewende Water, kry ek ñ oproep van ons huishulp wat reeds 15h00 vertrek het van my huis af: "Maruti, ek is veilig". Amper 7ure na haar vertrek.

In dieselfde asem kyk ek na video's van misdadige gedrag wat afspeel. Lees ek van woede en haat. Kom woede self in my op. Voel ek kwaad, hartseer en omgekrap. Want hoe dan nou? Waar is die kerk?

"Waarvoor moet ek vanaand bid voor ek gaan slaap?" Dink ek vir myself.

Bid ek vanuit my woede of bid ek vanuit my beginsels, my waardestelsel as Christen gelowige?

Die Bybel is vol van gebed.

In die Onse Vader leer ons dit is ñ saak tussen my en die Vader. ñ Beginsel saak, ñ saak waar oorvloed woorde nie nodig is nie (Matteus 6).

In tye soos hierdie weet ons nie eers wat om te bid nie, want ons is kwaad, ons is verward en selfs ook verlore. Dan leer ons weer by Romeine 8:26: "Die Gees staan ons ook in ons swakheid by: ons weet nie wat en hoe ons behoort te bid nie, maar die Gees self pleit vir ons met versugtinge wat nie met woorde gesê word nie."

Ek weet nie waarvoor jy bid of wat jou op die stadium dryf om te bid nie.

Weet jy mag bid in alle tye, tye van woede, van haat, van verwarring en ook in tye van vreugde.

Maar:

Mag jy egter nie vir ñ oomblik twyfel in die Een vir wie jy bid nie.

Mag jy gedryf word deur wie jy is in Christus.

Mag jy weet die Here is by jou, by ons en woorde is nie nodig.

En mag jy weet die Gees pleit vir ons. Ons is nie oorgelaat aan onsself nie.

Groete
Drian

Lewende Water - 5 Julie 2021

Wanneer jy in ‘n hoek vasgekeer voel of wanneer jy voel dat jy sleg behandel of te na gekom is, is ons natuurlike instink om te baklei. Ons bal beide ons vuiste. Ons neem maklik wraak. Om ander mense by te kom is ons natuurlike respons. Maar dit is juis die probleem. Wraak is natuurlik en nie geestelik nie.

Om iemand terug te kry is die reël van die bos. Om genade te betoon is die reël van die Koninkryk van God. Wanneer ons wraak neem sê ons eintlik: “Ek weet die Bybel sê die wraak kom U toe, Here (Romeine 12:19). Maar persoonlik dink ek U doen nie ‘n goeie werk nie. Ek sal die saak maar in eie hande neem. U het ‘n geneigdheid om ‘n bietjie te sag op te tree.”

Die huidige inperking maak dat baie van ons voel dat ons in ‘n hoek vasgekeer is. Ons is gefrustreerd en kort van draad. Wees ‘n slag sag met jouself. Kom ons doen moeite om met sagte oë na mekaar te kyk. Kom ons oefen ons om eerder met ‘n bril van genade na die wêreld te kyk. So kom God se nuwe wêreld nader en nader…

Ek sluit ons Lewende Water vandag af met ‘n ou Ierse seënwens spesiaal vir jou: “Mag jy altyd werk vir jou hande hê. Mag jou beursie altyd ‘n muntstuk bevat. Mag jy ‘n huis hê met ‘n venster waardeur die son skyn. Mag daar altyd ‘n reënboog ná jou reënbui wees, en mag die hand van jou vriend nooit te vêr wees nie. Mag God jou oë oopmaak vir jou naaste se nood; en mag Sy blydskap altyd jou hart vul.” Sterkte vir jou week.
Roelf

Lewende Water - 30 Junie 2021

Liewe Broer en Suster

Die dood het kom nes skop tussen ons.

Nie eers 2007 en 2008 se plaasaanvalle in die gemeente, het tot soveel begrafnisse in een week gelei nie. Hierdie week alleen, is daar 5 begrafnisse. Natuurlik is nie almal wat gesterf het aan Covid verwante siektes dood nie sommige is aan natuurlike oorsake oorlede.

As ek die sterftes sien en hoor van mense wat gehospitaliseer en/of siek by die huis is as gevolg van Covid dan besef ek, en ek vertrou jy ook, dat hierdie siekte nie jou speelmaat is nie.

Dit maak my bang as ek dink hoe argeloos en onverantwoordelik mense omgaan met die Covid-virus maar daarmee saam ook met mekaar. Die ergste is, die wat reken hulle gaan nie ‘n vaccine kry nie, ek wonder of hulle een oomblk daaraan dink dat hulle tussen ander mense leef. Hulle is dalk OK met min of geringe simptome maar ander wat by hulle die virus kry gaan dalk nie so gelukkig wees nie. Ek dink nie jy of ek, wil die oorsaak wees dat as gevolg van ons, iemand gesterf het omdat hy/sy by ons aangesteek het nie.

Kom ons be-oefen die waarde van verantwoordelikheid en respek.

Verantwoordelikheid is om te besef dat ek nie net verantwoordelik vir my eie lewe is nie maar ook vir die wat saam met my in dieselfde huis is. Ons is ook verantwoordelik vir hulle wat elke dag saam ons werk of my in die winkel by die teller help.

Respek vir jouself vir jou liggaam en jou gesondheid is mos nie onderhandelbaar nie. Kom ons respekteer mekaar deur ons maskers te dra, te saniteer en veilige afstand te hou.

Ons gebede en harte gaan uit na hulle wat siek en in die hospitaal is. Ons liefde en ondersteuning omarm hulle wat iemand aan die dood afgestaan het.

Mag Sy genade en liefde ons deur hierdie pandemie dra.

Groete Willem

Lewende Water - 27 Junie 2021

Liewe vriende.

Tyd.

ñ Baie kort woord, met baie krag. Ek dink in die grendeltyd het die woord selfs meer betekenis gekry. Saam met dit, óf meer as dit met die siekte wat al nader aan die huis kruip met die derdegolf, en al dieper seer maak verander ons betekenis van die woord net op nuwe maniere.

Vir party mense is tyd geld, met die eerste vlak 5 het almal gesmag na tyd om net weer te kan werk. Vir ander is tyd meer werd as geld, tyd saam ñ geliefde wat mens moes afstaan gedurende hierdie tydperk.

Die bepalende faktor is perspektief.

Iets wat die grendeltyd ons ook geleer het is om ons perspektief oor so baie dinge te verander en te skuif, ook wat tyd betref. Dalk het ons die "voorreg" om die "reset" knoppie te kon druk.

Wat beteken tyd vir my, hoe spandeer ek my tyd, kan ek my tyd beter aanwend?

Dan natuurlik ook die vraag en dalk op dié stadium die belangrikste vraag: Hoe spandeer jy tyd saam met die Here?

So baie gesprekke waar mens by betrokke is se ondertoon is moedeloosheid (afgemat voel en wees) en tyd saam met die Here is daarom so kosbaar en belangrik dat ons in onsself infesteer om op die beurt weer die rondom ons te kan dra.

Vriende die realiteit is baie van ons is tans moeg en afgemat. Daarom wil ek jou uitnooi om te dink oor tyd, tyd saam jou mense, maar ook tyd saam met die Here.

Hou in die tyd ook vas aan die woorde van Jeseja 40:30-31:"Selfs jongmanne word moeg en raak afgemat, selfs manne in hulle fleur struikel en val, maar dié wat op die Here vertrou, kry nuwe krag. Hulle vlieg met arendsvlerke, hulle hardloop en word nie moeg nie, hulle loop en raak nie afgemat nie. (JESAJA 40:30, 31 AFR83)

Tyd is kosbaar, jy is nie alleen.

Groete
Drian

Lewende Water - 20 Junie 2021

Die virus mag dalk jou liggaam aantas, maar moenie dat dit jou siel aantas nie.

Soos derduisende ander Suid Afrikaners het ons familie ook die afgelope paar weke kwaai deurgeloop onder die nare Covid virus. Na weke se isolasie, bekommernis oor geliefdes wat siek is en meer het ek agtergekom Covid is nou nie net meer besig om my liggaam aan te tas nie maar ook my siel of dan my emosionele welstand. Vrae soos “Waarom gryp U nie in nie Here?” het my gedagtes begin oorheers en ‘n vreemde tipe woede het vlak in my binneste begin nesmaak. Ek moes halt roep! Ek het besef dat my negatiewe gedagtes en moedeloosheid besig was om my in ‘n donker gat in te trek.

Dalk is jy nou daar? Moenie dat jou negatiewe gevoelens jou wegdryf van God af nie, neem dit eerder ná Hom toe! Praat oop en eerlik met Hom oor dit, Hy word nie deur ons eerlikheid geïntimideer nie. Bid dat Sy Heilige Gees jou versterk en jou denke vernuwe! Neem jou gedagtes gevange soos Paulus voorstel in 2 Korintiërs 10:5b, moenie alles wat in jou kop “val” oordink nie! Maak dit aan Christus onderdanig. Oefen om daagliks op God te fokus, Sy liefde, Sy trou, Sy nabyheid! Soek bemoediging in Sy Woord. Reik uit na ander, vra vir hulp! Jou hartsmense is God se geskenke en helpers aan jou. Fokus elke dag op goedheid uit Sy hand. Mag Sy Heilige Gees, ons Helper en Trooster jou gemoed optel, mag God jou self bemoedig en energie gee. Ons kan aanhou leef, voluit leef te midde van Covid! Ons hoef nie te wag vir beter dae nie. Nou is wat ons het, benut dit! Mag God ons hiermee help! Liefde
Liesel xx

Lewende Water - 8 Junie 2021

Die enigste oorlewende van ‘n skeepswrak het uitgekom op ‘n onbewoonde klein eiland.  Tot God het hy uitgeroep om hom tog te spaar en elke dag het hy uitgetuur oor die horison of daar nie miskien hulp sou opdaag nie.  Daar was egter NIKS op die horison nie. Uitgeput het hy vir hom ‘n rowwe hut gebou en sy paar besittinkies daarin gesit.  En toe eendag, nadat hy ‘n bietjie kos gaan soek het, kom hy by sy hut aan om te sien dat dit in vlamme gehul was.  Die rook het opgeborrel na die blou lug daarbo.  Die slegste wat kon het nou met hom gebeur.  Hy het die laaste goed wat hy gehad het, verloor.  Sy hart was verskeur. 

Die volgende dag egter, het daar ‘n skip opgedaag wat tot sy redding gekom het. “Hoe het julle geweet ek is hier?” het hy aan die bemanning gevra. “Ons het jou rooksein gesien,” was hul antwoord. 

Dit mag nie altyd so lyk of klink nie, maar jou huidige moeilike omstandighede mag instrumenteel wees tot jou toekomstige geluk.

Dit laat my aan die bekendste Psalm in die Bybel dink :  Die Here is my Herder; ek ly nie gebrek nie.  In groen weivelde laat Hy my rus; na water waar daar rusplek is, lei Hy my. Hy gee my nuwe lewenskrag; Hy lei my op die regte paaie ter wille van sy Naam. Selfs as ek in die donkerste kloof ingaan, is ek nie bang vir gevaar nie, want U is by my. Dit is u staf en u stok wat my gerusstel... (Psalm 23 - 2020 Vertaling)

Sterkte vir jou week

Roelf

 

Lewende Water - 1 Junie 2021

Liewe broer en suster.

Die lewe is kort, baie kort!

Ons kollegas sit en gesels oor die beplande basaar/kermis. Die beplande datum is oor 2 maande, Nov is oor 5 maande met Desember om die draai.

Johannes 10:10 - "Lewe in oorvloed". Richard Rohr skryf in sy boek dat ons moet tyd maak. Tyd om te dink en by jouself uit te kom. Elke dag is net 24 uur, elke dag is vol en vinnig om alles wat met ons gebeur te verwerk om sin daarvan te maak en aan te gaan.

Ek dink dit is wyse raad om een keer per week, op ‘n weeksdag of selfs oor 'n naweek iewers alleen te sit, op jou asemhaling te konsentreer en net te luister na jou eie gedagtes.

Ek dink dit is belangrik dat ons Jakobus 5 ernstig opneem. Ons weet nie wat môre bring nie.

Ek dink ons moet in ons stop en luister aandag gee aan ons gebedslewe. Of jy nou net “in check” soos ‘n vriend van my sê, tyd inruim vir intree gebede en of jy net stilword en die Onse Vader gebed bid, doen dit asb.

Ek dink jy moet stadiger begin loop, die druk van jouself afhaal om altyd te presteer meer lag kuier en koffie drink.

Mag jou week stadiger wees en mag jy meer intens elke dag leef. Groete
Willem

Lewende Water - 25 Mei 2021

Liewe vriende.

Partykeer is mens mos maar net waar die skrywer van Prediker was: "Wat kry ñ mens vir sy geswoeg in hierdie wêreld?" Dit is dood eenvoudig net ongelooflik moeilik om ñ gelowe te wees in die tye waarin ons leef.

Wat help dit om as gelowige maar net te probeer anders lewe in ñ samelewing wat wil voorkom asof alles verlore is? Wat help dit ek gee om? Kan ek nie maar net oorgee nie? Is dit nie maar net makliker om soos die res van die samelewing alles te laat vergaan nie?

Die teen vraag is natuur, waarheen anders sal ons gaan as ons nie na die Here toe draai nie? Na waardes waarin ons glo nie? En die realiteit is om weg te draai en oor te gee is niks anders as om deel te word van die probleem nie.

Die naweek hoor ek ñ gesprek waar ñ man aspris sjokolade en Coke in die voertuig hou, op die vraag waarom hy dit doen antwoord hy:"Dit is om die manne om te koop om my voor in die tou in te druk sodat ek eerste gehelp kan word." Laat mens wonder.

Die Prediker het egter tot die slotsom gekom met die woorde: "Dien God en gehoorsaam sy gebooie". Dit is wat van ons gevra word. Om te volhard ten spyte van die wêreld waarin ons onsself in bevind. Om anders te bly lewe al val alles rondom ons plat, om vas te hou aan dit waarin ons glo dit te bly leef met die hoop dat verandering moontlik is in Christus.

Ons word moeg maar moet nooit ophou hoop nie.

Groete
Drian

Lewende Water - 17 Mei 2021

Andrew Murray, die bekende Skotse prediker wat diep spore in ons land kom trap het, het die verhaal van ’n verskriklike storm wat op die see losbars, vertel. Reusagtige golwe slaan teen die rotse. Weerligtestrale verlig die donkerte. Die donderweer rammel en die wind bereik stormsterkte.

Diep in ’n rotsskeur sit ’n klein voëltjie met sy koppie rustig onder ’n vlerkie - vas aan die slaap.

Dit is vrede - om rustig te kan wees in ’n storm. Aan die storm kan die voëltjie niks doen nie - en hy hoef ook niks daaraan te doen nie – want hy is veilig. Sy Vader sorg vir hom. En hoekom sal hy hom bekommer oor iets waaraan hy niks kan doen nie?

Jesus sê in Matteus 6:26 en 27: Is julle nie baie meer werd as die wilde voëls nie? Trouens, wie van julle kan deur hom te bekommer sy lewe met een enkele uur verleng?

Hierdie Pinksterweek se tema is tong in die kies: Hoe om jou lewensstorm ses maal erger te maak...Ons noem dan ses goed wat jy moet doen om dinge te vererger. Die teenoorgestelde is natuurlik ook waar - as jy nie die ses dinge doen nie, kom jy gewoonlik makliker deur 'n storm. Die ses dinge is:
1. Soek heeltyd meer
2. Fokus op wat jy verloor het
3. Sit oogklappe aan
4. Hou aan uitstel
5. Gaan haal die bobbejaan agter die berg
6. Gee boedel oor
(Jy is welkom om die Pinksterdienste op ons webwerf http://www.kameeldrif.org te volg )

Mag jy ophou om die storms waarin jy is groter te maak deur die ses dinge hier bo te doen. Mag jy hierdie week die vrede van God ook in jou groot en klein storms ervaar.

Sterkte vir jou week.
Roelf.

Lewende Water - 10 Mei 2021

Ek weet nie of jy ook in die afgelope tyd verstom gestaan het oor die SpaceX Starship van Elon Musk wat sy sestien-verdieping-hoë-ruimtetuig veilig op Moeder Aarde geland het nie … Dit was ‘n suksesvolle proeflopie om die ruimteskip waarmee hy mense na die maan en Mars toe wil stuur, veilig op die grond te land. Kyk gerus na die volgende video: https://youtu.be/0owgS31GrZA

Eerskomende Donderdag vier ons weer die hemelvaart van ons Here Jesus Christus. Vir die groepie dissipels wat jare gelede saam met Jesus op die berg was en gesien het wat gebeur het, was dit ‘n lewensveranderende ervaring. Die res van die wêreld het egter nie eers geweet wat gebeur het nie – glad nie so indrukwekkend soos die SpaceX Starship nie.

En tog, hoewel dit ‘n klein begin was, het die paar dissipels begin met ‘n boodskap wat later deur die hele wêreld sou weerklink: Jesus Christus is die Here!

Mag jy in hierdie week ervaar dat die opgestane Here deur sy Gees by jou is. Mag jy die lewensveranderende krag van God se Gees ervaar.

Sterkte vir jou week.
Roelf

Lewende Water - 5 Mei 2021

Liewe vriende.

Die week ry ek verby ñ wit kruis teen ñ berg wat daar geplaas is om mense hoop te gee wat op ñ donker plek in hulle lewe is.

2 Korintiërs 12:9 sê: "My genade is vir jou genoeg. My krag kom juis tot volle werking wanneer jy swak is". In die konteks van die gedeelte besef Paulus dat hy net mens is en in afhanklikheid leef en nie sonder genade kan bestaan nie.

My vraag vir ons vandag en hierdie week is wat gee ons hoop? Wat gee vir ons krag? Leef ons uit genade en hoe word genade vir ons ñ realiteit?

Ek en jy is maar net mens, dit is waar en ons kan dit nie ontglip of ontgaan nie. Dit is deel van wie ons is. Wat ons as gelowiges dra is dat ons uit genade kan; mag en moet leef. Die waarheid is egter dat wanneer ons deur moeilike tye gaan ons dit nie altyd raak sien, óf beleef nie.

Maar hoe help 2 Korintiërs 12 dan? Ten eerste hou ons ons oë altyd op die kruis, en die genade wat daar deur ñ realiteit geword het. Ten tweede soek ons waar genade die afgelope tyd ñ realiteit geword het deur ñ vriend/vriendin, ouer, kind óf selfs deur ñ vreemdeling se optrede teenoor my en jou.

Die waarheid is dat die genade van die Here eintlik ons daagliks in die gesig staar soos die wit kruis op die berg, en opdaag op plekke en deur mense waar ons dit nie eers altyd verwag nie. En die realiteit is ek en jy kan die genade vir iemand wees deur ons lewe en optrede.

Waar het jy dalk genade beleef die week, of wie/wat was vir jou genade?

Mag jy in hierdie week altyd onthou, die kruis is ñ realiteit, wat genade ñ realiteit maak. Leef daarom met vrymoedigheid in en deur genade.

Groete.
Drian