Tyd: Sondag 10:00
Plek: Kerkgebou
Waarom 'n informele erediens?
Die kerk het in ons tyd bewus geraak van 'n groep mense wat God baie sterk ervaar in 'n meer informele omgewing, waar gesprek en deelname belangrike waardes is. Dit is nie slegs jongmense wat ons hiervan bewus maak nie, maar mense uit alle generasies, wat 'n tipe persoonlikheid en spiritualiteit in hulleself beleef waar hierdie meer informele omgewing belangrik is vir hulle. Dit is 'n plek waar ons die ligte musiek en populêre kunste ernstig opneem vir kontemporêre aanbidding. Hierdie meer informele omgewing maak dit ook ideaal om kinders interaktief deel te maak van die erediens. Lees gerus meer oor ons waardes as 'n familiekerk.
Wie sal hier gemaklik voel?
As jy gemaklik voel in 'n erediens waar jy jou vriende kan gaan groet soos hulle in die kerk inkom, waar kinders maar kan rondloop, en waar kitare en ander instrumente gebruik word om die musiek te maak sal jy gemaklik voel in hierdie erediens. Die predikant sal gereeld deur vrae of ander illustrasies mense deelmaak van die gesprek wat in hierdie erediens gevoer word.
